16-18 февраль кунлари Бирлашган Араб Амирликларининг Дубай шаҳрида каратэ бўйича нуфузли "Karate 1-Premier League #2" мусобақаси бўлиб ўтди.

Турнирда иштирок этган спортчиларимиз ичида -60кг вазн тоифасида юртимиз шарафини ҳимоя қилган Садриддин Сайматов бронза медалини қўлга киритди. Спортчимиз дастлабки жангида Жанубий Корея вакили Жи Хван Лини 6:2 ҳисобида, кейин малайзиялик Сентхил кумаран Селварани фаоллик эвазига (0:0), учинчи жангда испаниялик Матиас Гомес Гарсияни 2:0 ҳисобларида мағлубиятга учратди. Ярим финал жангида эса афсуски, туркиялик Самдан Ерай фаоллик эвазига ҳамюртимизни мағлуб эта олди (0:0).

Бронза медали учун кечган жангда Садриддин Марокаш терма жамоаси аъзоси Абессалам Амекнассидан 4:3 ҳисобида устун келди ва мусобақа совриндорлари қаторидан жой олди.

Эслатиб ўтамиз, Садриддин 2017 йилги ушбу турнирда олтин медални қўлга киритганди. Бу йил ҳисобида эса у Париждаги мусобақада бронза медали соҳибига айланган.