16-18 fevral kunlari Birlashgan Arab Amirliklarining Dubay shahrida karate bo‘yicha nufuzli "Karate 1-Premier League #2" musobaqasi bo‘lib o‘tdi.

Turnirda ishtirok etgan sportchilarimiz ichida -60kg vazn toifasida yurtimiz sharafini himoya qilgan Sadriddin Saymatov bronza medalini qo‘lga kiritdi. Sportchimiz dastlabki jangida Janubiy Koreya vakili Ji Xvan Lini 6:2 hisobida, keyin malayziyalik Sentxil kumaran Selvarani faollik evaziga (0:0), uchinchi jangda ispaniyalik Matias Gomes Garsiyani 2:0 hisoblarida mag‘lubiyatga uchratdi. Yarim final jangida esa afsuski, turkiyalik Samdan Yeray faollik evaziga hamyurtimizni mag‘lub eta oldi (0:0).

Bronza medali uchun kechgan jangda Sadriddin Marokash terma jamoasi a’zosi Abessalam Ameknassidan 4:3 hisobida ustun keldi va musobaqa sovrindorlari qatoridan joy oldi.

Eslatib o‘tamiz, Sadriddin 2017 yilgi ushbu turnirda oltin medalni qo‘lga kiritgandi. Bu yil hisobida esa u Parijdagi musobaqada bronza medali sohibiga aylangan.