Ўзбекистон ва Қозоғистон мамлакатлари ўртасидаги яхши қўшничилик ва ҳамкорлик муносабатлари тобора мустаҳкамланиб бормоқда. Иқтисодий-ижтимоий, сиёсий, гуманитар, қишлоқ хўжалиги каби тармоқлар қатори энди спорт соҳасида ҳам кенг кўламли ўзаро тажриба алмашинув йўлга қўйиляпти.

Шу кунларда таэквондо бўйича Қозоғистон терма жамоаси аъзолари Ўзбекистон таэквондо (WTF) ассоциацияси базасида ўқув-йиғин машғулотлари олиб боришяпти.

18-30 апрель кунларига мўлжалланган машғулотларга таркибида Turkish Open, Dutch Open, German Open каби нуфузли турнирларнинг ғолиб ва совриндори бўлган спортчилар ҳам иштирок этишяпти. Вакилларимиз билан биргаликда ўтаётган ушбу ҳамкорлик галдаги турнирларга тараддуд вазифасини ўтаб беради.

Эслатиб ўтиш жоиз, икки давлат вакиллари Бутунжаҳон таэквондо федерацияси томонидан ўтказиладиган нуфузли мусобақалар, Осиё ва Олимпия ўйинлари, қитъа ва жаҳон чемпионатларида юқори ўринлар учун даъвогарлар сафида эътироф этилади.