O‘zbekiston va Qozog‘iston mamlakatlari o‘rtasidagi yaxshi qo‘shnichilik va hamkorlik munosabatlari tobora mustahkamlanib bormoqda. Iqtisodiy-ijtimoiy, siyosiy, gumanitar, qishloq xo‘jaligi kabi tarmoqlar qatori endi sport sohasida ham keng ko‘lamli o‘zaro tajriba almashinuv yo‘lga qo‘yilyapti.

Shu kunlarda taekvondo bo‘yicha Qozog‘iston terma jamoasi a’zolari O‘zbekiston taekvondo (WTF) assosiasiyasi bazasida o‘quv-yig‘in mashg‘ulotlari olib borishyapti.

18-30 aprel kunlariga mo‘ljallangan mashg‘ulotlarga tarkibida Turkish Open, Dutch Open, German Open kabi nufuzli turnirlarning g‘olib va sovrindori bo‘lgan sportchilar ham ishtirok etishyapti. Vakillarimiz bilan birgalikda o‘tayotgan ushbu hamkorlik galdagi turnirlarga taraddud vazifasini o‘tab beradi.

Eslatib o‘tish joiz, ikki davlat vakillari Butunjahon taekvondo federasiyasi tomonidan o‘tkaziladigan nufuzli musobaqalar, Osiyo va Olimpiya o‘yinlari, qit’a va jahon chempionatlarida yuqori o‘rinlar uchun da’vogarlar safida e’tirof etiladi.