Саудия Арабистонилик ҳакам Фаҳад Ал Мирдаси ЖЧ-2018 мусобақасида ишлаши лозим эди, аммо у келишилган ўйин ташкиллаштиришда айбланиб, дисквалификация қилинди.

Саудия Арабистони футбол федерацияси 32 ёшли ҳакамни келишилган ўйин ташкиллаштиришда айблаб, четлатди. Ал Мирдаси мамлакат кубоги финалини бошқариши керак эди.

Федерация тарқатган маълумотга кўра, Ал Мирдаси клублардан бирининг вакилига текстли хабар йўллаб, маълум сумма эвазига уларга керакли бўлган натижани таъминлашни таклиф қилган. Клуб бу ҳақида дарҳол федерацияни огоҳлантирган ва ҳуқуқни муҳофаза қилиш органларига хабар берган.

Ҳакам айни пайтда полицияда сақланмоқда. Ал Мирдаси ўйин олдидан алмаштирилган. У Конфедерациялар кубогида ишлаган, ЖЧ-2018 да ҳам ишлаши лозим эди.

Саудия Арабистони ФИФАга мурожаат қилиб, ушбу дисквалификацияни дунё миқёсида қўлламасликни сўраган.