Эртага Таэквондо WTF ассоциациясига қарашли «Универсал» спорт мажмуасида дзюдо бўйича Миллий олимпия қўмитаси соврини учун турнир бошланади.

Мамлакатимизда дзюдони янада оммавийлаштириш ва ривожлантириш, иқтидорли спортчиларни саралаб олиш мақсадида ташкил этилаётган турнирда кураш, самбо, белбоғли кураш спорт турларида фаолият олиб бораётган полвонлар ҳам иштирок этишлари мумкин бўлади. Баҳслар дзюдо қоидалари асосида ташкил қилинади. Сараланган иқтидорлар Олимпия спорт тури ҳисобланган дзюдога йўналтирилади. Чунки, Олимпия ўйинларида медаллар сонини кўпайтириш бугунги кундаги энг асосий вазифалардан бири ҳисобланади.

Беллашувлар эркаклар ўртасида -60, -66, -73, -81, -90, -100 ва +100кг вазн тоифаларида, аёллар ўртасида эса -48, -52кг, -57кг, -63кг, -70кг, -78кг ва +78кг вазн тоифаларида ташкил қилинади.

Бугун мусобақада қуръа ташлаш ва вазн ўлчаш маросимлари бўлиб ўтади. Асосий баҳслар эса эртага бошланади.