Ertaga Taekvondo WTF assosiasiyasiga qarashli «Universal» sport majmuasida dzyudo bo‘yicha Milliy olimpiya qo‘mitasi sovrini uchun turnir boshlanadi.

Mamlakatimizda dzyudoni yanada ommaviylashtirish va rivojlantirish, iqtidorli sportchilarni saralab olish maqsadida tashkil etilayotgan turnirda kurash, sambo, belbog‘li kurash sport turlarida faoliyat olib borayotgan polvonlar ham ishtirok etishlari mumkin bo‘ladi. Bahslar dzyudo qoidalari asosida tashkil qilinadi. Saralangan iqtidorlar Olimpiya sport turi hisoblangan dzyudoga yo‘naltiriladi. Chunki, Olimpiya o‘yinlarida medallar sonini ko‘paytirish bugungi kundagi eng asosiy vazifalardan biri hisoblanadi.

Bellashuvlar erkaklar o‘rtasida -60, -66, -73, -81, -90, -100 va +100kg vazn toifalarida, ayollar o‘rtasida esa -48, -52kg, -57kg, -63kg, -70kg, -78kg va +78kg vazn toifalarida tashkil qilinadi.

Bugun musobaqada qur’a tashlash va vazn o‘lchash marosimlari bo‘lib o‘tadi. Asosiy bahslar esa ertaga boshlanadi.