Ўзбекистон Профессионал футбол лигаси ўз футболчилари олдида қарздор бўлиб қолган клублар билан жиддий иш олиб бораётгани маълум. Бундан ташқари клублар ўз зиммаларидаги бошқа қарздорликларни ҳам бартараф этган бўлишлари лозим.
Август ойи келган бўлса-да, айрим клублар қарздорлик масаласини ёпганича йўқ. Шундан келиб чиқиб, Фарғонанинг “Ёзёвон” ҳамда Наманганнинг “Норин” футбол клублари 4—5 август кунлари ўз ўйинларини ўтказа олмасликлари катта эҳтимол. “Норин” 4 август куни ўз уйида “Динамо”ни қабул қилиши, эртасига эса “Ёзёвон” майдонида “Хотира-79” меҳмон бўлиши керак эди.
Мазкур клублар бутун июль ойида деярли ҳеч қандай иш бажарганича йўқ. Ўйинга икки кун вақт қолганида эса клуб вакиллари ҳаракатга келди. Агар учрашув стартига қадар вазият ижобий томонга ўзгармаса, ПФЛ комиссарлари мезбонларга техник мағлубият ёзади. Бу ҳол иккинчи бор такрорланса, клублар Про-Лига ўйинларидан четлаштирилади.
“Хоразм” клуби раҳбарияти трансфер ойнаси вақтида қарздорликлар юзасидан иш олиб борган бўлиб, 5 августга қадар бу ишни якунлаш бўйича кафолат хати тақдим этганди. Клуб ўз ваъдасида турмаса, 9 август куни “Орол”га қарши учрашувни ўтказа олмайди.
Худди шундай кафолат хати “Хотира-79” футбол клубида ҳам бор. Жамоа раҳбарияти ўз гарданига масъулиятни ҳис қилмаса, мазкур клубни ҳам юқоридаги каби тақдир кутиб турибди.
Профессионал футбол лигаси клублар ўзини ўнглаб олиши учун етарлича вақт берди. Бундан буёғига талаб қатъий бўлади. Ўз муаммолари атрофида ўралашиб қолаётган клублар 2019 йилдан бошлаб фаолиятини формати ўзгараётган иккинчи лигада давом эттириши мумкин бўлади.
