O‘zbekiston Professional futbol ligasi o‘z futbolchilari oldida qarzdor bo‘lib qolgan klublar bilan jiddiy ish olib borayotgani ma’lum. Bundan tashqari klublar o‘z zimmalaridagi boshqa qarzdorliklarni ham bartaraf etgan bo‘lishlari lozim.

Avgust oyi kelgan bo‘lsa-da, ayrim klublar qarzdorlik masalasini yopganicha yo‘q. Shundan kelib chiqib, Farg‘onaning “Yozyovon” hamda Namanganning “Norin” futbol klublari 4—5 avgust kunlari o‘z o‘yinlarini o‘tkaza olmasliklari katta ehtimol. “Norin” 4 avgust kuni o‘z uyida “Dinamo”ni qabul qilishi, ertasiga esa “Yozyovon” maydonida “Xotira-79” mehmon bo‘lishi kerak edi.

Mazkur klublar butun iyul oyida deyarli hech qanday ish bajarganicha yo‘q. O‘yinga ikki kun vaqt qolganida esa klub vakillari harakatga keldi. Agar uchrashuv startiga qadar vaziyat ijobiy tomonga o‘zgarmasa, PFL komissarlari mezbonlarga texnik mag‘lubiyat yozadi. Bu hol ikkinchi bor takrorlansa, klublar Pro-Liga o‘yinlaridan chetlashtiriladi.

“Xorazm” klubi rahbariyati transfer oynasi vaqtida qarzdorliklar yuzasidan ish olib borgan bo‘lib, 5 avgustga qadar bu ishni yakunlash bo‘yicha kafolat xati taqdim etgandi. Klub o‘z va’dasida turmasa, 9 avgust kuni “Orol”ga qarshi uchrashuvni o‘tkaza olmaydi.

Xuddi shunday kafolat xati “Xotira-79” futbol klubida ham bor. Jamoa rahbariyati o‘z gardaniga mas’uliyatni his qilmasa, mazkur klubni ham yuqoridagi kabi taqdir kutib turibdi.   

Professional futbol ligasi klublar o‘zini o‘nglab olishi uchun yetarlicha vaqt berdi. Bundan buyog‘iga talab qat’iy bo‘ladi. O‘z muammolari atrofida o‘ralashib qolayotgan klublar 2019 yildan boshlab faoliyatini formati o‘zgarayotgan ikkinchi ligada davom ettirishi mumkin bo‘ladi.