Яна бир кундан сўнг Жакартада XVIII Осиё ўйинларининг очилиш маросими бўлиб ўтади. Ушбу муҳим тадбир олдидан Олимпия шаҳарчасида жойлашган Ўзбекистон Миллий олимпия қўмитаси штабида ишчи гуруҳ ва спорт федерациялари вакиллари иштирокида йиғилиш ўтказилди. Уни Миллий олимпия қўмитаси Бош котиби Жасур Матчанов олиб борди.
Йиғилиш давомида эртанги очилиш маросимига бағишланган режалар, шунингдек, бир қатор ташкилий масалалар, юзага келган муаммоларни бартараф этиш, спортчиларнинг муҳим баҳсларга руҳий тайёргарлиги муҳокама қилинди. Зеро, 19 августдан бошлаб асосий баҳсларга старт берилади. Ушбу муҳим беллашувларга спортчиларимизнинг рухан тайёр бўлиши натижаларга албатта ўзининг ижобий таъсирини кўрсатади. Бу ҳам йиғилиш давомида кўрилган энг асосий масалалардан бири бўлди.
Маълумот учун, 19 август куни биринчилардан бўлиб сузиш, эркин кураш, ушу, ўқ отиш, академик эшкак эшиш, теннис ҳамда қиличбозлик бўйича баҳсларда спортчиларимиз ўз иштирокларини бошлашади.
