«Истиқлол» - «Динамо» (0:1) учрашувидан кейин Самарқанд жамоаси бош мураббийи Даврон Файзиев ўйин борасида тўхталиб ўтди.

- Авваламбор, бутун Ўзбекистон ҳалқини Қурбон ҳайити айёми билан табриклайман. Ўйин ҳақида тўхталадиган бўлсам, бугунги Фарғонадаги ғалабамиз “Динамо” мухлислари учун қўшалоқ байрам бўлди, деб ўйлайман. “Истиқлол” ўтган турларда пешқадам “Андижон”ни мағлуб этганлигини инобатга олсак, бу жамоага қарши баҳс жуда оғир ўтишини билардик. Футболчиларимиз ўйин охиригача кураш олиб бориб, деярли тенгкурашлар остида кечган баҳсдан Самарқандга муҳим ғалаба билан қайтишимизни таъминлашди. Йигитларимиз ўйинидан қониқдим, курашишдан тўхташмади. Ўйин давомида бизда ҳам рақибда ҳам гол уриш имкониятлари бўлди, Худога шукурки, омад бизга кулиб боқди. Мавсумнинг иккинчи қисмидаги 3 та ўйинда 9 очко олганимиздан хурсандман. Айниқса, биздан юқорида бўлган “Машъал”, “Истиқлол” жамоалари билан баҳсларда ғалаба қозониш муҳим эди. Ғалабани унутиб, шу йўсинда ишлаб, мақсадимиз сари интилишда давом этамиз. Олдинда бизни қийин баҳслар кутиб турибди. Сўзим якунида улуғ ва муқаддас байрам билан бутун халқимизни яна бир марта табриклаб, энг яхши тилакларни тилаб қоламан.