Ўзбекистон футбол ассоциацияси Профессионал футбол лигаси ҳар ойнинг лауреатларини аниқлаб келаётганидан хабарингиз бор. Шуниси қувончлики, август ойининг энг яхши ўйинчиси деб “Металлург” ҳужумчиси Исломбек Исоқжонов топилди. Суперлига жамоалари бош мураббийлари, сардорлари ва мухлислар ўртасида ўтказилган сўровномада Исоқжонов 57 балл жамғариб, энг яқин таъқибчиси АГМК ярим ҳимоячиси Жасур Ҳасановни 8 баллга ортда қолдирди. “Пахтакор” ҳужумчиси Исмоил Гонсалвеш 25 балл билан учинчи ўринни банд этди. Сўровномада кейинги поғоналарни Зоҳир Пиримов ҳамда Дарко Никачлар банд этишди.

Сўровномада иштирок этганлардан 7 нафари Исломбекни биринчи ўринга жойлаштиришган бўлишса, Исоқжоновнинг исми шарифи 13 марта иккинчи, 4 марта учинчи поғонада қайд этилди. Ўз навбатида мухлислар ҳам Исломбек Исоқжоновга биринчи ўринни беришган.

Биз Исломбек Исоқжоновни август ойи лауреати бўлганлиги билан самимий табриклаймиз ва унга кейинги босқичда ҳам ушбу шижоатини йўқотмасдан жамоа муваффақиятларига ўз улушини қўшиб юришини тилаймиз. Исоқжонов эса ҳозирча “Локомотив”га қарши ўйинда “Металлург”га ёрдам беролмайди. Гап шундаки, унинг сариқ карточкалари сони тўрттага етган ва навбатдаги учрашувни ўтказиб юбориши лозим. Афсуски бу ўйин “Локомотив”га қарши учрашувдир.