Аргентинанинг "Ривер Плейт" ва "Бока Хуниорс" жамоалари ўртасидаги Либертадорес кубоги финалининг жавоб ўйини бўлиб ўтадиган жой ва унинг вақти аниқ бўлди.

Учрашув 9 декабрь куни Мадриддаги "Сантьяго Бернабеу" стадионида ўтказиладиган бўлди. Бу ҳақда мусобақанинг Твиттердаги саҳифаси хабар тарқатди.

Эслатиб ўтамиз, Либертадорес кубогининг дастлабки ўйини "Ривер Плейт" майдонида ўтказилиб, унда 2:2 ҳисобидаги дуранг қайд этилганди. Буэнос-Айресдаги жавоб ўйини эса 24 нобярь куни бўлиб ўтиши керак эди. Аммо "Ривер" мухлислари ўйин куни рақиб жамоа автобусига ҳужум уюштириши оқибатида баъзи футболчилар жароҳат олишди. Дастлаб ўйин 25 ноябрь кунига кўчирилганди, аммо учрашувни номаълум муддатга қолдиришга қарор қилишди.

Либертадорес кубоги финали 9 декабрдан 10 декабрга ўтар кечаси Тошкент вақти билан 00:30да бошланади.

Дарвоқе, ўша куни "Реал"нинг ҳам ўйини бор бўлиб, "қаймоқранглилар" Ла лига баҳсини сафарда — "Уэска" майдонида ўтказишади.