Эрта тонгдан кайфиятни кўтарамиз. Ишга келишда ажойиб ўхшатишга кўзим тушди. Масалан, оддий футбол мухлиси шуни ёзганида, индамай кетишим мумкин эди. Бироқ бу сўзлар Ўзбекистоннинг кўзга кўринган футбол клубида фаолият олиб борадиган ва анчагина ҳурматли (кесатмадим) инсон томонидан битилганди:

“Фараз қилинг сизни товуқхонангиз бор. Ичида бир неча оддий ва бир неча олтиндан тухум қўядиган товуқлар бор. Олтиндан берадиганлари касал бўлиб қолди. Даволаш учун пул керак. Пулни отадан олиш керак. Энди сиз отадан пул олиш ўрнига: "товуқларни ўзи топсин пул" деб ўтирибсизда”.

Футбол клубларимизни товуққа ўхшатишди. Бу ҳақиқий шедевр ўхшатиш бўлди. Кеча муҳокама бўлганида, ЎФА президенти клубларга пул топиб бериши керак деган масалани кўтаришганди. Янгиликларни ҳар куни ўқийман, лекин Испания ёки Англия футбол ассоциациялари президентлари клубларга ҳомий қидириб юргани борасидаги хабарга кўзим тушмаган. Балки юқоридаги фикрлар ривожланишнинг ўзбек модели бўлса керак.

P.S. Ҳа, Мираброр Усмонов вақтида шундай ишларни кўрганмиз. Қўлидан келгани учун яхшилик қилган. Аслида бу унинг вазифасига кирмайди. Ва кўряпмизки, клублар вакиллари шу йўсинда давом этишни исташади. Улар товуқ бўлишга ҳам тайёр, улардан пул топишни талаб қилишмаса бўлди.

Диёр Имомхўжаев