Erta tongdan kayfiyatni ko‘taramiz. Ishga kelishda ajoyib o‘xshatishga ko‘zim tushdi. Masalan, oddiy futbol muxlisi shuni yozganida, indamay ketishim mumkin edi. Biroq bu so‘zlar O‘zbekistonning ko‘zga ko‘ringan futbol klubida faoliyat olib boradigan va anchagina hurmatli (kesatmadim) inson tomonidan bitilgandi:

“Faraz qiling sizni tovuqxonangiz bor. Ichida bir necha oddiy va bir necha oltindan tuxum qo‘yadigan tovuqlar bor. Oltindan beradiganlari kasal bo‘lib qoldi. Davolash uchun pul kerak. Pulni otadan olish kerak. Endi siz otadan pul olish o‘rniga: "tovuqlarni o‘zi topsin pul" deb o‘tiribsizda”.

Futbol klublarimizni tovuqqa o‘xshatishdi. Bu haqiqiy shedevr o‘xshatish bo‘ldi. Kecha muhokama bo‘lganida, O‘FA prezidenti klublarga pul topib berishi kerak degan masalani ko‘tarishgandi. Yangiliklarni har kuni o‘qiyman, lekin Ispaniya yoki Angliya futbol assosiasiyalari prezidentlari klublarga homiy qidirib yurgani borasidagi xabarga ko‘zim tushmagan. Balki yuqoridagi fikrlar rivojlanishning o‘zbek modeli bo‘lsa kerak.

P.S. Ha, Mirabror Usmonov vaqtida shunday ishlarni ko‘rganmiz. Qo‘lidan kelgani uchun yaxshilik qilgan. Aslida bu uning vazifasiga kirmaydi. Va ko‘ryapmizki, klublar vakillari shu yo‘sinda davom etishni istashadi. Ular tovuq bo‘lishga ham tayyor, ulardan pul topishni talab qilishmasa bo‘ldi.

Diyor Imomxo‘jayev