«Manchester Siti» himoyachisi Yoshko Gvardiolning jamoadagi kelajagi so‘roq ostida turibdi. Bu haqda taniqli insayder va jurnalist Florian Plettenberg xabar bermoqda.

Manbaning ma’lum qilishicha, xorvatiyalik futbolchining oldida faoliyatini davom ettirish uchun ikkita asosiy variant mavjud: u yo «shaharliklar» bilan amaldagi shartnomasini uzaytiradi (klub tomonidan aniq taklif futbolchining stolida turibdi) yoki shu yozda Madridning «Real» klubiga ko‘chib o‘tadi.

Hozirda «qaymoqranglilar» Gvardiol transferiga jiddiy qiziqish bildirmoqda. O‘z navbatida, «Manchester Siti» rahbariyati ham xorvatiyalik himoyachini qo‘yib yubormoqchi emas va yangi bitim imzolashi uchun unga faol ravishda bosim o‘tkazmoqda.

Qayd etilishicha, Germaniyaning «Bavariya» klubi futbolchi uchun kechayotgan kurashda ishtirok etmayapti. Myunxenliklarga Gvardiolning o‘yini ma’qul kelayotgan bo‘lsa-da, ular uchun bu transfer moliyaviy jihatdan haddan tashqari qimmatlik qiladi.