«Реал» бош мураббийи Сантьяго Солари «Уэска»га қарши бўладиган ўйиндан олдин матбуот анжуманида иштирок этди.

«Уэска» ҳақида
«Ишончим комил, улар илк дақиқаларданоқ бизни максимал куч билан ҳаракат қилишга мажбур қилишади. Биз ҳимояда эҳтиёткор ҳаракат қилиб, ҳужумда тажавузкор бўлишимиз лозим. Йигитларни қўшимча руҳлантириш шарт эмас деб ўйлайман. Биз Ла лигада чемпионлик учун охиригача курашамиз».

Бошланғич таркиб ҳақида
«Бошланғич таркибни танлашда кўп нарсага аҳамият қаратаман: футболчиларнинг формаси, мураббийлар штабининг фикри, рақиб. Мен фақат битта бошланғич таркибга суяниб қолмайман».

Маркос Льоренте ҳақида
«Мен жамоа бошқарувига келгунимга қадар, у деряли ўйнамаган эди. Футболчида тажриба ва ўйин амалиёти бўлмаса — бу қийин. Унинг яхши ўйнаётганида ўзининг ҳиссаси катта. У профессионал футболчи. Футболчи учун энг қийин иш — бу машғулот ўтказиш, формани сақлаб туриш, аммо майдонга тушмаслик. Маркос кўп ўйин амалиётига эга бўлмаётган бўлса-да, у жамоада бахтли».

«Ривер Плейт» – «Бока Хуниорс» ўйини ҳақида
«Бундай ўйинни ўз майдонимизда қабул қилиш — биз учун шараф. Аммо иш бу даражагача етиб келмагани яхши эди. Умид қиламан, барчаси юқори савияда ўтади ва ҳеч қандай муаммо пайдо бўлмайди».

Тони Кроос ҳақида
«Клуб берган баёнотни такрорлашим мумкин. У клублар ўртасидаги жаҳон чемпионатигача тикланиши лозим. Сўнгги сўзни шифокорлар айтишади».

Кейлор Навас ҳақида
«Менда кимгадир қандайдир маслаҳат бериш учун ваколат йўқ. Ҳар бир ўйинчининг ўз ҳиссиётлари мавжуд. «Реал» сафида ўйнашдан яхшироқ ажойиб нарса йўқ. Фақат шуни айта олишим мумкин».

Гарет Бэйл ҳақида
«У «Валенсия»га қарши ўйинда жароҳат олмади. Ўзини бироз ноқулай ҳис қилди. У «Эйбар», «Рома» ва «Валенсия»га қарши ўйинларда борини бериб ўйнади. Унинг ўйинидан қониқиш ҳосил қилаётганимни унга инглиз тилида айтдим. Баъзида ўзинг истаган барча нарса амалга ошмайди. Аммо уни танқид қилмайман. Бундан ташқари, у «Рома» дарвозасига ажойиб гол урди».