«ПСЖ» юлдузи Хвича Кварацхелиянинг укаси, 16 ёшли грузиялик футболчи Торнике Кварацхелия Европанинг гранд клубларидан бири билан шартнома имзолаши мумкин. Goal портали берган маълумотларга кўра, Мюнхеннинг «Бавария» клуби ёш истеъдод эгасини ўз сафига қўшиб олишга жиддий қизиқиш билдирмоқда.

Ҳозирда кичик Кварацхелия Тбилисининг «Динамо» жамоаси шарафини ҳимоя қилмоқда. Шунингдек, Торнике Грузиянинг 17 ёшгача бўлган терма жамоасига ҳам мунтазам чақирилмоқда.

Эслатиб ўтамиз, «Бавария» айни кунларда УЕФА Чемпионлар лигаси ярим финалида айнан «ПСЖ»га қарши баҳс олиб бормоқда. Дастлабки ўйинда мюнхенликлар парижликларга 4:5 ҳисобида имкониятни бой беришган эди. Жавоб учрашуви 6 май куни Мюнхендаги стадионда бўлиб ўтади.