Осиё кубоги гуруҳ босқичи 2-туридан ўрин олган Туркманистон ва Ўзбекистон ўртасидаги баҳс якунланди. Унда миллий терма жамоамиз йирик 4:0 ҳисобида ғалаба қозонди.
Учрашувни ҳамюртларимиз ҳужумкор бошлади ва 17-дақиқада бу ўз самарасини берди Достон Ҳамдамовнинг қанотдан оширган тўпини Жавоҳир Сиддиқов дарвозага йўллаб қўйди.
Орадан 7 дақиқа ўтгач Шукуровнинг ажойиб пасини Шомуродов голга айлантирди. Голдан сўнг устинлик яққол терма жамоамиз аъзоларига ўтиб кетди.
Ўйиннинг 40-дақиқасида Жалолиддин ҳисобни 3:0 кўринишига келтириб қўйган бўлса, орадан 2 дақиқа ўтгач яна Шомуродов номини таблога ёздириб қўйди. Шу тариқа биринчи бўлим 4:0 ҳисобида якунланди.
Иккинчи бўлимни ҳам ҳамюртларимиз анча фаол бошлашди. Иккинчи бўлим бошида Акмал Шораҳмедов ўрнига Купер Даврон Ҳошимовни туширди.
Терма жамоамиз аъзолари бир қатор қулай вазиятларга эга бўлишди, бироқ бошқа гол ура олишмади. Баъзи вазиятларда дарвоза устуни халал берган бўлса, баъзида ҳужумлар якунига етмай қолди.
Шу тариқа, Ўзбекистон терма жамоаси иккинчи ўйинда ҳам ғалаба қозониб, муддатдан аввал плей-офф масаласини ҳал қилди.
Осиё кубоги-2019. "F" гуруҳи, 2-тур
ТУРКМАНИСТОН - ЎЗБЕКИСТОН 0:4 (0:4)
Голлар: Жавоҳир Сиддиқов (17), Элдор Шомуродов (24, 42), Жалолиддин Машарипов (40)
Огоҳлантириш: Анзур Исмоилов (73)
Туркманистон: Маммет Ўразмуҳаммедов, Сердар Аннаўразов, Мекан Сапаров, Зафар Бабажанов, Везиргелди Илясов, Гурбангелди Батиров, Руслан Мингазов, Расул Хўжаев, Аҳмет Атаев (Мурат Аннаев 42), Арслонмурот Аманов (Илья Тамуркин 65), Воҳит Ўразсаҳедов (Алтимурат Аннадурдиев 46).
Ўзбекистон: Игнатий Нестеров, Акмал Шораҳмедов (Даврон Ҳошимов 46), Анзур Исмоилов, Ислом Тўхтахўжаев, Олег Зотеев, Достон Ҳамдамов, Отабек Шукуров, Одил Аҳмедов (Фозил Мусаев 76), Жалолиддин Машарипов, Жавоҳир Сиддиқов (Икром Алибоев 68), Элдор Шомуродов
