Бугун ўзбек футболи учун катта ҳажмда иш бажарган инсон Евгений Валикий 90 ёшга тўлди.
Евгений Борисович турли йилларда ўзбек футболига кўплаб истеъдодларни тайёрлаб берган.
Евгений Валицкий футболчилик фаолиятини Тошкентнинг “Спартак”, “Труд” жамоаларида ўтказган. 1961 йилдан бошлаб эса мураббийлик соҳасида хизмат қилиб келган. Тошкентнинг СКА, “Сокол” жамоаларида тажрибасини бойитди. Айнан “Сокол” жамоаси билан Қуролли Кучлар кубогини қўлга киритгач, 1963 йилги мавсумнинг “Пахтакор” стадионидаги очилиш учрашувида 60000 томошабин кўз ўнгида Евгений Валицкийга “Ўзбекистонда хизмат кўрсатган мураббий” фахрий унвони топширилган.
Евгений Борисовичнинг саъйи ҳаракатлари билан “Нефтяник” (Фарғона), “Наримановец” (Хоразм), “Соҳибкор” (Ҳалқабод) жамоалари собиқ Иттифоқ биринчиликларида ўз ўрни, мавқеига эга бўлган. Жуда кўплаб шогирдлар етиштирди. Улар орасида ўз жамоаларига садоқат кўрсатган Юрий Саркисян, Рустам Мирсодиқов сингари мутахассислар бор.
Валицкий клублардаги мураббийлик фаолияти бўйича ҳам айтишга арзигулик ютуқларга эришган. 1999 йили Тошкент вилоятининг “Дўстлик” жамоаси билан Ўзбекистон чемпиони бўлган. Собиқ иттифоқ йилларида “Пахтакор” ва “Нефтяник” клубларида муваффақиятли ишлаган.
Турли йилларда у “Пахтакор” (Тошкент), “Спартак” (Андижон), “Спартак” (Қозоғистон), ”Нефтяник” (Фарғона), ”Лада” (Тольятти), ”Наврўз” (Андижон), “Дўстлик” (Тошкент вилояти) клубларида мураббийлик қилган. Геннадий Красницкий, Стадник, Биродар Абдураимов, Юрий Пшеничников, Аҳрол Иноятов сингари афсоналарни ўзбек футболига етказиб берган инсон айнан Евгений Борисович ҳисобланади. "Пахтакор" футбол клуби 90 ёшга тўлиши муносабати билан Евгений Валицкийни табриклайди ва унинг клубимиз, ўзбек футболи ривожига қўшган ҳиссаси учун миннатдорчилик билдиради.
