Хабарингиз бор, асли ўзбекистонлик бўлган, аммо сўнгги йилларни Туркиянинг турли лигаларида ўтказиб келаётган легионеримиз Асрор Ғофуров жорий мавсумдан фаолиятини Ўзбекистон Суперлигасида давом эттирадиган бўлди. Ўтган мавсум Про-лига ғолибига айланиб, Суперлигага йўл олган “Андижон” жамоаси бу мавсум ўз олдига катта мақсадларни қўйган. “Бургутлар” Асрор Ғофуров билан 1 йиллик шартнома имзолади.
Сайтимиз ходими Жалолиддин Қобилжонов “бургутлар”нинг янги аъзоси Ғофуров билан боғланганда, футболчи нима учун, “Андижон”ни танлагани, жамоанинг режалари ва янги мавсумга тайёргарлиги ҳақида гапириб ўтди.
“Узоқ йиллардан сўнг яна Ўзбекистон чемпионатига қайтганимдан хурсандман. “Андижон” жамоаси билан 1 йиллик шартнома имзоладик.
Жамоанинг янги мавсумдаги мақсадлари менга ёқди шу сабабли айна “Андижон”ни танладим. Шунингдек, аввалдан водийда тўпсуриш ниятим бор эди. Водийда футболни севишади бу ерда мухлислар футбол билан яшайди.
Ҳозирда жамоамиз янги мавсумга кўтаринки руҳда тайёргарликни давом эттирмоқда. Янги мавсумда “Андижон” Суперлиганинг ҳар қандай клубига қийинчилик тўғдиради”, -дейди Асрор Ғофуров.
Маълумот учун, Асрор Ғофуров "Пахтакор" клуби тарбияланувчиси ҳисобланади. Унинг Туркиядаги охирги жамоаси “Ичелспор” ҳисобланади.
