Xabaringiz bor, asli o‘zbekistonlik bo‘lgan, ammo so‘nggi yillarni Turkiyaning turli ligalarida o‘tkazib kelayotgan legionerimiz Asror G‘ofurov joriy mavsumdan faoliyatini O‘zbekiston Superligasida davom ettiradigan bo‘ldi. O‘tgan mavsum Pro-liga g‘olibiga aylanib, Superligaga yo‘l olgan “Andijon” jamoasi bu mavsum o‘z oldiga katta maqsadlarni qo‘ygan. “Burgutlar” Asror G‘ofurov bilan 1 yillik shartnoma imzoladi.
Saytimiz xodimi Jaloliddin Qobiljonov “burgutlar”ning yangi a’zosi G‘ofurov bilan bog‘langanda, futbolchi nima uchun, “Andijon”ni tanlagani, jamoaning rejalari va yangi mavsumga tayyorgarligi haqida gapirib o‘tdi.
“Uzoq yillardan so‘ng yana O‘zbekiston chempionatiga qaytganimdan xursandman. “Andijon” jamoasi bilan 1 yillik shartnoma imzoladik.
Jamoaning yangi mavsumdagi maqsadlari menga yoqdi shu sababli ayna “Andijon”ni tanladim. Shuningdek, avvaldan vodiyda to‘psurish niyatim bor edi. Vodiyda futbolni sevishadi bu yerda muxlislar futbol bilan yashaydi.
Hozirda jamoamiz yangi mavsumga ko‘tarinki ruhda tayyorgarlikni davom ettirmoqda. Yangi mavsumda “Andijon” Superliganing har qanday klubiga qiyinchilik to‘g‘diradi”, -deydi Asror G‘ofurov.
Ma’lumot uchun, Asror G‘ofurov "Paxtakor" klubi tarbiyalanuvchisi hisoblanadi. Uning Turkiyadagi oxirgi jamoasi “Ichelspor” hisoblanadi.
