Жорий йилнинг 28 февраль куни таниқли футбол ҳаками Равшан Эрматов Тошкентдаги Сингапур менежментни ривожлантириш институтига ташриф буюрди. ФИФА рефериси ташриф чоғида Институтда таҳсил олаётган талабаларга танлаган касбига муҳаббат қўйиш, унга профессионалларча ёндошиш ҳамда муваффақиятга эришиш сирлари билан бўлишди.

Суҳбат давомида Р.Эрматов шунингдек, муваффақиятга эришишда инсоний фазилатларнинг ўрни катта экани, камтарлик, сидқидилдан меҳнат қилиш, танлаган касбида ҳалоллик билан фаолият юритиш ва қийин вазиятларда ҳам меҳнат қилишдан ҳеч қачон қочмаслик муҳимлиги ҳақида жонли мисоллар билан гапириб ўтди.

Суҳбатнинг иккинчи қисми талабалар билан савол-жавоб шаклида давом этди. Унда талабалар табиийки, терма жамоамизнинг суст ўйин кўрсатаётгани ҳақида савол билан мурожаат қилишди. Эътиборли томони, Осиёнинг беш карра энг яхши ҳаками бу каби саволлар тўғри манзилга берилса, мақсадга мувофиқ бўлишини айтиб, унинг ўзи ҳам Ўзбекистон терма жамоасини тезроқ мундиалда иштирок этишидан умидвор эканини яширмади.

Тадбир сўнгида Равшан Эрматов талабаларга ўзининг эсдалик совғалари сифатида — сариқ ва қизил карточкалари бера туриб, “Ўқишда ва ҳаётда қоида бузмаслигингиз лозимлигини эслатиб туриши учун”, — дейиши, унинг ҳазилкаш ва самимий инсонлигидан далолат берди.