Joriy yilning 28 fevral kuni taniqli futbol hakami Ravshan Ermatov Toshkentdagi Singapur menejmentni rivojlantirish institutiga tashrif buyurdi. FIFA referisi tashrif chog‘ida Institutda tahsil olayotgan talabalarga tanlagan kasbiga muhabbat qo‘yish, unga professionallarcha yondoshish hamda muvaffaqiyatga erishish sirlari bilan bo‘lishdi.

Suhbat davomida R.Ermatov shuningdek, muvaffaqiyatga erishishda insoniy fazilatlarning o‘rni katta ekani, kamtarlik, sidqidildan mehnat qilish, tanlagan kasbida halollik bilan faoliyat yuritish va qiyin vaziyatlarda ham mehnat qilishdan hech qachon qochmaslik muhimligi haqida jonli misollar bilan gapirib o‘tdi.

Suhbatning ikkinchi qismi talabalar bilan savol-javob shaklida davom etdi. Unda talabalar tabiiyki, terma jamoamizning sust o‘yin ko‘rsatayotgani haqida savol bilan murojaat qilishdi. E’tiborli tomoni, Osiyoning besh karra eng yaxshi hakami bu kabi savollar to‘g‘ri manzilga berilsa, maqsadga muvofiq bo‘lishini aytib, uning o‘zi ham O‘zbekiston terma jamoasini tezroq mundialda ishtirok etishidan umidvor ekanini yashirmadi.

Tadbir so‘ngida Ravshan Ermatov talabalarga o‘zining esdalik sovg‘alari sifatida — sariq va qizil kartochkalari bera turib, “O‘qishda va hayotda qoida buzmasligingiz lozimligini eslatib turishi uchun”, — deyishi, uning hazilkash va samimiy insonligidan dalolat berdi.