Бугун Грузия пойтахтида дзюдо бўйича Гран-при сериясига кирувчи навбатдаги мусобақа старт олади. Токио Олимпиадасига қимматли рейтинг очколарини тақдим этувчи мазкур турнирнинг биринчи кун доирасида ҳамюртимиз Шарофиддин Лутфуллаев баҳсларга киришади.
Қуръага кўра, жаҳон рейтингининг саккизинчи поғонасида турган дзюдочимиз мусобақада ўз вазнининг биринчи рақамли спортчиси сифатида иштирок этади. Юқори рейтинг ўрни сабаб биринчи даврадан эркин ўтади ва иккинчи босқичда Рустам Ибраев (Қозоғистон) ҳамда Даниель бен Давид (Исроил) баҳси ғолиби билан куч синашади.
Юртдошимиз март ойининг бошида Марракеш шаҳрида ўтган Гран-при турнирида зафар қучди ва ҳозир ҳам юқори спорт формасида. Лутфуллаев 2015 йили Тбилиси Гран-присида муваффақият қозонган. Эслатиб ўтамиз, мусобақада ғолиб чиққан дзюдочилар жаҳон ва Олимпиада рейтингида 700 очкога эга бўлишади.
