«Динамо» - «Металлург» (2:1) учрашувининг 90+2-дақиқасида ажойиб гол урган ҳимоячи Миркомил Локаев Самарқанд клубига мавсумдаги илк ғалабани келтирди. Ўйиндан кейин футболчининг фикрлари билан қизиқдик.

- “Насаф” билан дастлабки ўйиндаги дуранг ва “Сурхон” билан сафардаги аламли мағлубиятдан кейин “Металлург” билан учрашувда мухлисларимизни ғалаба билан қувонтириш шарт эди. Барчамиз ўйиндан олдин буни жуда яхши тушиниб, мураббийларимиз ҳар томонлама ўйинга тайёрлашганди. Рақибимиз “Металлург” жамоаси кучли таркибга эга ҳурматга сазовор клуб саналади. Ўйин икки жамоа учун ҳам жуда оғир кечди. Худога шукур, биз охиригача кураш олиб бордик ва ғалабани қўлга киритдик.

Сўнгги дақиқада киритган голим “Динамо”га ғалаба келтирганидан жуда ҳам хурсандман. Мен фақат ўйин якунида эмас, ўйин давомида ҳам ҳимоядан мураббийларимиз кўрсатмаси билан ҳужумга қўшилиб турдим. Очиғини айтсам, гол уришимни сезгандек эдим. Ўша вазиятда бош билан гол уриш қийин бўлса-да, омад кулиб боқди. Бу фаолиятимдаги энг муҳим гол бўлди.

Чинданам, “Металлург” дарвозасига киритган ғалаба голим фаолиятимдаги дастлабкиси бўлди. Ғалабамиз бутун жамоанинг мураббийлар кўрсатмаси билан охиригача курашгани ва мухлисларнинг қўллаб-қувватлаши эвазига бўлди. “Динамо” битта оилага айланган. Насиб қилса, ғалабали юришни давом эттиришга бор кучимизни сарфлаймиз” – дейди 24 ёшли “Динамо” ҳимоячиси Миркомил Локаев.