Узоқ йиллик танаффусдан кейин "Ливерпуль" чемпионликни қўлга киритиши мумкин. Мерсисайдликлар Англия премьер-лигасининг 34-тури доирасида ўз майдонларида "Челси"ни қабул қилиб, мураккаб ғалабани қўлга киритди.

Фойдаланилмаган имкониятлар
Клопп шогирдларини фақат ва фақат ғалаба қаноатлантирар эди. Табиийки, мезбонлар ўйинни фаол бошлашди. Улар танаффусга қадар 3та голли вазият яратишди. Икки марта Кепа Аррисабалага яхши ҳаракат қилган бўлса, бир вазиятда Садьо Манега аниқлик етишмади.

Икки дақиқада иккита гол
Иккинчи бўлим бошида ниҳоят "Ливерпуль" ҳисобни очди. Жарима майдончасининг ўнг томонида Салоҳ-Фирмино-Хендерсон қисқа пасларидан кейин Жордан тўпни шундай етказдики, Мане бўш қолган дарвозани ишғол қилмаслиги "гуноҳ" бўларди.

Орадан 2 дақиқа ўтар-ўтмас Салоҳ ўнг қанотда тўпни қабул қилиб, бир ҳимоячини алдаганча марказ томон юрди ва кучли зарба берди. Олис "тўққизлик"га кираётган тўпни Кепа Аррисабалага қайтара олмади.

Эҳ, Азар...
Ўтказиб юборилган голларга қарамай лондонлик ўзларини йўқотиб қўйишмади. "Челси" етакчиси Эден Азар бир дақиқа ичида иккита ўта қулай имкониятлардан фойдалана олмади. 59-дақиқада у мезбонлар посбони билан яккама-якка вазиятга чиқиб, зарба берди. Тўп устунга тегиб қайтди. Орадан 1 дақиқа ўтиб, чап қанотдан етказиб берилган узатмага яна ўша Эден "Ливерпуль" дарвозабони билан юзма-юз ҳолатда зарба берди. Алиссон ўзи томон йўлланган зарбани бартараф этди.

Ҳисобга қараб ўйин
Шундан сўнг Клопп шогирдлари рақибга бошқа хавфли вазият яратиш имконини бермади. Майдон эгалари тўпни яхши назорат қилиб, имкон бўлиши билан ҳужум ташкил қилиш пайида бўлди. "Ливерпуль" ушбу ҳисобни сақлаб қолди ва муҳим 3 очкони қўлга киритди.

Ким чемпион бўлади?
Бугунги ғалабадан кейин "Ливерпуль" асосий рақиби "Манчестер Сити"дан 2 очко олдинга ўтиб олди. "Шаҳарликлар" ҳисобида битта захира ўйини бор. "Ливерпуль" 4та ўйиндан 2тасини сафарда "Кардифф" ва "Ньюкасл"га қарши, қолган 2тасини ўз майдонида эса "Ҳаддерсфилд" ва "Вулверхэмптон" билан баҳс олиб боради.

"Манчестер Сити"ни эса 20 ва 24 апрель кунлари кетма-кет "Тоттенхэм" ва "Манчестер Юнайтед"га қарши қийин ўйинлар кутиб турибди. Гвардиола жамоаси мана шу 2та тўқнашувда очко йўқотмаса, чемпионлик масаласи уларнинг қўлида қолади.

"Челси" эса бугунги мағлубиятга қарамай, АПЛ жадвалида кучли тўртликка қилди. "Арсенал" эса эртага "Уотфорд"ни мағлуб этса, ҳамшаҳарларидан ўтиб кетади.

АПЛ, 34-тур
Ливерпуль – Челси 2:0 (0:0)
Голлар: 1:0 – 51 Мане, 2:0 – 53 Салах.
Ливерпуль – Алиссон, Александер-Арнолд, Матип, ван Дейк, Робертсон, Фабиньо, Хендерсон (Милнер, 77), Кейта (Вейналдум, 66), Мане, Фирмино, Салах (Шакири, 90).
Челси – Аррисабалага, Эмерсон, Давид Луиз, Аспиликуэта, Рюдигер (Кристенсен, 40), Азар, Лофтус-Чик (Баркли, 75), Виллиан, Жоржиньо, Хадсон-Одои (Игуаин, 56), Канте.
Огоҳлантириш: Аспиликуэта (44).