Ўзбекистон Республикаси Президенти илгари сурган 5 та ташаббусда мамлакатимиз ёшлари орасида спортни ривожлантириш, уларни жисмонан соғлом ва фаол бўлишларини таъминлаш, соғлом турмуш тарзини тарғиб қилиш масаларига алоҳида урғу берилган.
Бугун ушбу ташаббус ижроси доирасида Жаҳон иқтисодиёти ва дипломатия университети (ЖИДУ), Миллий олимпия қўмитаси (МОҚ) ва Ўзбекистон футбол ассоциацияси (ЎФА) ўртасида ҳамкорлик йўлга қўйилди.
Ушбу ҳамкорликка асосан ЖИДУда спорт бошқаруви кадрларини тайёрлаш, турли Миллий ва Халқаро спорт федерациялари билан мустаҳкам алоқалар ўрнатиш, шунингдек, ЖИДУ магистратурасида “Спорт хуқуқи” кафедрасини ташкил этиш режалаштирилган.
Тадбир давомида сўзга чиққан МОҚ президенти Умид Аҳмаджонов ушбу воқелик қанчалик аҳамиятли эканига алоҳида тўхталиб ўтди.
“Биз профессионал спортимизни янада ривожлантириш учун спорт бошқаруви соҳасида ҳам жаҳоннинг етакчи мамлакатлари қаторига кириб боришимиз керак. Келажакда университет билан ҳамкорликни янада ривожлантириб, малакали кадрларни тайёрлаш бўйича иш олиб борамиз. Бунинг учун университетнинг иқтидорли талабаларини йирик халқаро мусобақаларда делегациямиз билан биргаликда фаолият олиб бориши каби кенг имкониятлар яратиб берамиз. Спорт ҳуқуқи ва бошқаруви бўйича мутахассис кадрлар юртимиз спортини янги босқичга олиб чиқишда муҳим ўрин тутади”, – деди Умид Аҳмаджонов.
Шундан сўнг, Жаҳон иқтисодиёти ва дипломатия университети биринчи проректори Матёкуб Бақоев ва Миллий олимпия қўмитаси президенти, Ўзбекистон футбол ассоциацияси биринчи вице-президенти Умид Аҳмаджонов “Спортда бошқарув кадрларини тайёрлаш бўйича ҳамкорлик тўғрисида”ги меморандумни имзолашди.
Мазкур меморундум талабалар ўртасида спортни янада оммалаштириш, уларни соғлом турмуш тарзига жалб қилишда муҳим аҳамиятга эга. Тадбирни университет раҳбарияти, МОҚ, ЎФА мутасаддилари, спортимиз фахрийлари, Абдулло Тангриев, Муроджон Аҳмадалиев, Баҳодир Жалолов, Шоҳжаҳон Эргашев, Ирода Тўлаганова каби ўзбек спорти юлдузлари, талабалар ҳамда Оммавий ахборот воситалари ходимлари катта қизиқиш билан кузатиб боришди.
Таъкидлаш жоиз, меморандум имзоланишидан аввал ҳар икки томон тор доирада учрашув ташкил қилиб, келажакда бундай ҳамкорликни янада чуқур йўлга қўйиш нуқтаи назаридан келишувга эришишди. ЖИДУ талабалари соҳалари бўйича ўз амалиётларини Ўзбекистон Миллий олимпия қўмитасида олиб боришлари мумкинлиги, университетда эса Эктор Купер, Любинко Друлович каби юртимизда фаолият олиб бораётган жаҳонга машҳур мураббийлар ёки ўзбек спорти юлдузлари иштирокида учрашувлар ташкил қилиш шулар жумласидандир.
Хабарингиз бор, Ўзбекистон 2030 йилги Осиё ўйинларига мезбонлик қилишни режалаштирмоқда. Бугун имзоланган меморандум бўлажак йирик комплекс мусобақага муносиб тайёгарлик кўриш йўлида ҳар томонлама илғор кадрларни етиштириб бериши билан янада аҳамиятлидир.
Тадбир давомида мартабали меҳмонлар Университет раҳбарияти ҳамроҳлигида ЖИДУ кутубхонасига ташриф буюришди. Умид Аҳмаджонов кутубхонага Ахбор Имомхўжаевнинг яқинда нашрдан чиққан ва ўзбек футболининг 100 йиллигига бағишлаб чоп этилган “Аср футболидаги асл қадрдонларим” ҳамда МОҚнинг “Олимп сари” китобларидан совға қилди. Ўз навбатида университет раҳбарияти кутубхонада Миллий олимпия қўмитаси бурчагини ташкил қилиш ҳақида таъкидлаб ўтишди.
Шунингдек, ЖИДУ спорт майдончасида спортнинг мини-футбол, теннис ва волейбол турлари бўйича мусобақалар ўтказилди. Тадбир иштирокчилари ва меҳмонлар талаба спортчилар ўртасидаги мусобақаларни томоша қилишди.
Эътиборингизга ушбу тадбирдан фотосуратларни ҳавола қиламиз:
