Пойтахтимиздаги спорт ўйинлари ва енгил атлетикага ихтисослашган Республика олий спорт маҳорати мактабида гандбол бўйича 2002-2003 йилларда туғилган ўсмирлар ўртасида Ўзбекистон биринчилиги ўтказилмоқда. Унда Қашқадарё вилоятидан ташқари республикамизнинг барча ҳудудлари жамоалари ғолиблик учун баҳсларга киришди.   Аввалига жамоалар 4та гуруҳга тақсимланишди. Унга кўра ўз гуруҳларида дастлабки икки ўринни қўлга киритган жамоалар ғолиблик учун курашни давом эттирса, 3-ўрин соҳиблари 9-12-ўринлар учун баҳс юритарди. Муросасиз кечган курашлар натижасида "А" гуруҳидан Қорақалпоғистон Республикаси ҳамда Наманган вилояти, "В" гуруҳидан Тошкент шаҳри ва Андижон вилояти, "С" гуруҳидан Сурхондарё ва Тошкент вилоятлари, ниҳоят "D" гуруҳидан Хоразм ва Фарғона вилояти жамоалари плей-оффга чиқишди.   Ҳал қилувчи босқичда кутилганидек Тошкент шаҳри, Қорақалпоғистон Республикаси, шунингдек Сурхондарё ҳамда Андижон вилояти жамоалари ярим финал босқичида курашни давом этттирадиган бўлди. Аксинча, гуруҳ босқичида ажойиб ўйинлар намойиш этган хоразмликлар чорак финалда андижонлик тенгқурларига имкониятни бой берди - 36:30. Холбуки Хоразм вилояти жамоаси ғолибликка асосий даъвогарлардан бири сифатида эътироф этилаётган эди.     Плей-офф босқичида қайд этилган натижалар:   9-12-ўринлар учун   Жиззах - Бухоро - 33:26   Навоий - Сирдарё - 52:51   1-8-ўринлар учун   Қорақалпоғистон Республикаси - Тошкент вил. - 38:35   Тошкент ш. - Фарғона - 48:26   Наманган - Сурхондарё - 26:28   Андижон - Хоразм - 36:30   Мусобақа ғолиблари эртага аниқланади.