Америка кубоги финалида сенсация рўй бермади. Бразилия терма жамоаси Перуни ишончли тарзда мағлуб этди.

Баҳснинг 15-дақиқасида Эвертон ҳисобни очган бўлса, биринчи бўлим тугашига 1 дақиқа қолганида ҳакам Бразилия дарвозасига пенальти белгилади. Шу тариқа, мезбонлар посбони Алиссон турнирдаги илк голни ўз дарвозасидан олиб чиқди.

Орадан 1 дақиқа ўтиб Габриэл Жезус рақиб дарвозасини ишғол қилди ва танаффусга "пентакампеонлар"нинг ҳисобда олдинга чиққан ҳолда йўл олишини таъминлади.

Иккинчи бўлимда ҳам майдон эгалари ўйинни назорат қилишди, аммо вазиятлардан фойдалана олишмади. Боз устига, Жезус майдондан четлатилиб, жамоасини қийин аҳволда қолдирди. Шунга қарамай, Перу рақиб дарвозаси олдида хавфли вазиятларни ярата олмади. Боз устига, учрашувнинг сўнгги дақиқасида бразилияликлар пенальти ишлашга муваффақ бўлишди. Ришарлисон ундан самарали фойдаланиб, ўйин тақдирини ҳал қилди.

Шу тариқа, Бразилия терма жамоаси сўнгги 12 йил ичида илк марта, ўз тарихида эса тўққизинчи марта Копа Американи қўлга киритди.

Америка кубоги-2019, Финал
Бразилия – Перу 3:1 (2:1, 1:0)
Голлар: 1:0 – 15 Эвертон, 1:1 – 44, пенальти Герреро, 2:1 – 45 Габриэл Жезус, 3:1 – 90, пенальти Ришарлисон.
Бразилия – Алиссон, Дани Алвес, Маркиньос, Тиаго Силва, Алекс Сандро, Артур, Каземиро, Габриэл Жезус, Коутиньо (Эдер Милитао, 77), Эвертон (Аллан, 90), Фирмино (Ришарлисон, 75).
Перу – Гальесе, Адвинкула, Самбрано, Абрам, Трауко, Тапия (Гонсалес, 82), Йотун (Руидиас, 78), Флорес, Куэва, Каррильо (Поло, 86), Герреро.
Огоҳлантиришлар: Габриэл Жезус (30), Тапия (49), Тиаго Силва (53), Самбрано (68), Адвинкула (84), Ришарлисон (90).
Четлатиш: Габриэл Жезус (70).