Amerika kubogi finalida sensasiya ro‘y bermadi. Braziliya terma jamoasi Peruni ishonchli tarzda mag‘lub etdi.

Bahsning 15-daqiqasida Everton hisobni ochgan bo‘lsa, birinchi bo‘lim tugashiga 1 daqiqa qolganida hakam Braziliya darvozasiga penalti belgiladi. Shu tariqa, mezbonlar posboni Alisson turnirdagi ilk golni o‘z darvozasidan olib chiqdi.

Oradan 1 daqiqa o‘tib Gabriel Jezus raqib darvozasini ishg‘ol qildi va tanaffusga "pentakampeonlar"ning hisobda oldinga chiqqan holda yo‘l olishini ta’minladi.

Ikkinchi bo‘limda ham maydon egalari o‘yinni nazorat qilishdi, ammo vaziyatlardan foydalana olishmadi. Boz ustiga, Jezus maydondan chetlatilib, jamoasini qiyin ahvolda qoldirdi. Shunga qaramay, Peru raqib darvozasi oldida xavfli vaziyatlarni yarata olmadi. Boz ustiga, uchrashuvning so‘nggi daqiqasida braziliyaliklar penalti ishlashga muvaffaq bo‘lishdi. Risharlison undan samarali foydalanib, o‘yin taqdirini hal qildi.

Shu tariqa, Braziliya terma jamoasi so‘nggi 12 yil ichida ilk marta, o‘z tarixida esa to‘qqizinchi marta Kopa Amerikani qo‘lga kiritdi.

Amerika kubogi-2019, Final
Braziliya – Peru 3:1 (2:1, 1:0)
Gollar: 1:0 – 15 Everton, 1:1 – 44, penalti Gerrero, 2:1 – 45 Gabriel Jezus, 3:1 – 90, penalti Risharlison.
Braziliya – Alisson, Dani Alves, Markinyos, Tiago Silva, Aleks Sandro, Artur, Kazemiro, Gabriel Jezus, Koutinyo (Eder Militao, 77), Everton (Allan, 90), Firmino (Risharlison, 75).
Peru – Galyese, Advinkula, Sambrano, Abram, Trauko, Tapiya (Gonsales, 82), Yotun (Ruidias, 78), Flores, Kueva, Karrilyo (Polo, 86), Gerrero.
Ogohlantirishlar: Gabriel Jezus (30), Tapiya (49), Tiago Silva (53), Sambrano (68), Advinkula (84), Risharlison (90).
Chetlatish: Gabriel Jezus (70).