Англия чемпионатининг 2-тури доирасида «Манчестер Юнайтед» сафарда «Вулверхэмптон» меҳмони бўлди.

Биринчи турда "Челси" устидан қозонилган йирик ҳисобдаги ғалабадан сўнг "МЮ" бу сафар яққол фаворит сифатида эътироф этилаётган эди. Улар биринчи бўлим давомида ўйинни назорат қилишди, аммо у қадар кўп вазият ярата олмади. Шунга қарамай, учрашувнинг 27-дақиқасида яратилган ягона вазиятни Антони Марсиал голга айлантиришга муваффақ бўлди.

Мезбонлар иккинчи бўлимга катта иштиёқ билан чиқиб келиб, ҳужумга отланишди. 54-дақиқада жарима зарбасидан кейин тўп тўсинга тегиб қайтди. Орадан бир дақиқа ўтиб эса Рубен Невеш томонидан 17 метрдан йўлланган зарба тўсин орқали тўрга бориб тушди.

Учрашувнинг 67-дақиқасида Поль Погба жамоадоши билан "девор" ўйнаб "бўрилар" жарима майдончасига ёриб кирди ва пенальти ишлади. Футболчининг ўзи 11 метрли жарима зарбасини тепди, аммо дарвозабон тўпни қайтарди.

Ўйиннинг қолган дақиқаларида Сульшер шогирдлари хавфли вазият ярата олишмади ва дуранг билан кифояланишди.

Англия премьер-лигаси, 2-тур
Вулверхэмптон – Манчестер Юнайтед 1:1 (0:1, 1:0)
Голлар: 0:1 – 27 Марсьяль, 1:1 – 55 Рубен Невеш.
Ноаниқ пенальти: Поль Погба (68, дарвозабон)
Вулверхэмптон – Руй Патрисиу, Беннетт, Коуди, Боли, Доэрти (Траоре, 46), Дендонкер, Рубен Невеш, Моутинью, Кастро, Хименес (Кутроне, 90), Диогу Жота (Нету, 86).
Манчестер Юнайтед – Де Хеа, Уан-Биссака, Линделеф, Магуайр, Шоу, Погба, Мактомини, Жеймс (Гринвуд, 89), Лингард (Мата, 81), Рэшфорд (Перейра, 89), Марсьяль.
Огоҳлантиришлар: Жеймс (24), Рубен Невеш (51), Беннетт (67), Уан-Биссака (84).