«Барселона» ва Аргентина терма жамоаси сардори Лионель Месси Америка кубоги-2019 якунлари бўйича Рим папаси фондидан махсус совғани қабул қилди.

32 ёшли футболчига мозамбиклик болалар томонидан латтадан тайёрланган тўп тортиқ қилинди. Бу тўп соф футбол рамзи бўлиб, бутун дунё бўйлаб болалар кўчада бундай тўп билан футбол ўйнашади.

Ушбу соврин бирдамлик руҳияти, ҳалоллик, ҳурмат ва жамоавий меҳнат учун Рим папаси томонидан тақдим этилади. Унинг ғолиби жамғарма ҳомийлиги остидаги таълим муассасалари ўқувчилари ўртасида ўтказиладиган сўровнома орқали аниқланади.

Сўровномада Месси 34,28% овозга эга бўлди ҳамда перулик — Эдисон Флорес (15,56%), Педро Гальесе (11,28%) ва бразилиялик Дани Алвес (10,5%)ни ортда қолдирди.