Екатеринбургда бокс бўйича жаҳон чемпионати якунига етди. Ўзбекистон делегацияси ўз тарихида илк маротаба жаҳон чемпионатида умумжамоа ҳисобида биринчи ўринни эгаллади.

Турнирда 8 спортчи билан иштирок этган терма жамоамизнинг 5 нафари медални қўлга киритди. Уч нафар боксчимиз — Шаҳобиддин Зоиров (52 кг.), Миразизбек Мирзахалилов (57 кг.) ва Баҳодир Жалолов (+91 кг.) олтин медални қўлга киритишди. Дилшодбек Рўзметов (81 кг.) кумуш медаль билан чекланган бўлса, Бобо-Усмон Батуров (69 кг.) бронза медалига эга чиқди.

Мезбон — Россия термаси ҳам 3та олтин медални қўлга киритди. Улар ҳисобида кумуш медаль йўқ, битта бронзага эга бўлишди. Шунинг учун россияликлар Ўзбекистондан ортда қолишди.

Кучли учликка Қозоғистон терма жамоаси кирди. Қўшниларимиз 1та олтин, 1та кумуш ва 4та бронзани қўлга киритишди.

Гамбург-2017да 5та олтин медаль билан умумжамоа ҳисобида биринчи ўринни олган Куба бу сафар 4-поғонада қолди — биттадан олтин, кумуш ва бронза медаллари.

Мана шу 4та мамлакат вакиллари Екатеринбург-2019да олтин медалларни бўлиб қолишди. Яна 11та давлат боксчилари ўз юртларига кумуш ва бронза медаллари билан қайтадиган бўлишди.