Хитойнинг Ухань шаҳрида навбатдаги Бутунжаҳон ҳарбийлар ўйинлари старт олди. Дунёнинг 150 га яқин мамлакат вакиллари иштирок этаётган мазкур мусобақада Ўзбекистон терма жамоаси ҳам асосий таркиб билан қатнашмоқда.
Бугун мусобақанинг биринчи кун беллашувлари ортда қолди. Эътиборлиси, дзюдочиларимизнинг ушбу кунда кўрсатган ажойиб натижаси бизни умумжамоа ҳисобида тўртинчи ўринга олиб чиқди.
Баҳслар давомида -66 килограмм вазн тоифасида икки ўзбек дзюдочилари Артём Штурбабин ҳамда Муҳриддин Тилововнинг финалгача етиб келгани кўпчиликнинг диққат-марказида бўлди. Ўзига хос “ўзбекча финал”да Штурбабиннинг қўли баланд келди. Шунингдек, -73 килограмм вазн тоифасида Ҳикматиллоҳ Тўраев олтин, -52 килограммда эса Диёра Келдиёрова бронза медаллари билан тақдирланди.
Шу тариқа Ўзбекистон делегацияси ҳисобида биринчи кундан сўнг 2 та олтин, 1 та кумуш ва 1 та бронза медаллари мавжуд.
