«Барселона» ҳужумчиси Лионель Месси ўзининг олтинчи «Олтин тўп»ини қабул қилиб олганидан кейин таассуротлари билан ўртоқлашди.

«Аввало менга овоз берган журналистларга миннатдорчилик билдираман. Ғалабалар ва мағлубиятлар билан ўтган ажойиб йилни ўтказишда менга ёрдам берган клуб ва термадаги жамоадошларимга раҳмат айтмоқчиман. Сиз ҳам мазкур эътирофнинг бир қисмисиз.

Шахсий ва спортдаги ҳаётимдан розиман. Йилдан йилга яхши бўлишга ҳаракат қиляпман. Энг яхши бўлиш учун ишлашдан тўхтамайман.

Индивидуал совринлар – бу муҳим эътироф бўлиб, аммо улар ҳамиша иккинчи даражали бўлиб қолади, асосийси жамоавий ютуқлар. Мен ҳар йили шунга интиламан. Мен ҳамиша совринлар учун курашга тайёрламан, аммо баъзида режам амалга ошади, баъзида эса — йўқ.

Мен учун тарихнинг, клубим тарихининг бир қисми бўлиш — шараф. Биз жаҳоннинг энг яхши жамоаларидан бири эканимиздан фахрланаман. «Олтин тўп» каби совринлар клубнинг даражасини оширади.

Мазкур эътироф учун миннатдорчилик билдираман. Биз учун бу муҳим кун. Бугун хурсандчилик қиламиз, кейин эса олдинга қараб интиламиз.

Ушбу соврин янада куч билан ишлашга ёрдам беради. Лекин жамоа даражасидаги совринларни ютиш мақсадида ишлашда давом этиш учун менга индивидуал совринлар шарт эмас. Биз одатдагидек яна уриниб кўрамиз, умид қиламан, бу сафар омадимиз келади», – деди Месси.