Хабар берганимиздек, айни кунларда Хитойнинг Тяньцзинь шаҳрида оғир атлетика бўйича жаҳон кубоги мусобақалари бўлиб ўтмоқда.
Мусобақанинг бугунги дастури ҳам ҳамюртларимиз учун муваффақиятли бошланди. Бугунги баҳслар доирасида қизлар ўртасида -81 кг вазнли атлетимиз Турсуной Жабборова ҳам жамоамиз ҳисобига учта медаль қўшиб қўйди.
Ҳамюртимиз даст кўтариш машқида 100 кг, силтаб кўтаришда 120 кг, иккикурашда эса 220 кг тошни ўзига бўйсундирди ва ҳар уччала йўналишда ҳам кумуш медаль соҳибасига айланди.
Жаҳон кубоги доирасида эркаклар ўртасида -109 кг вазнли атлетлар орасида бўлиб ўтган беллашувларда эса вакилларимиз олтин медалга сазовор бўлди. Ушбу вазн тоифасида ватанимиз шарафини ҳимоя қилган Акбар Жўраев учкураш якунига кўра битта олтин ҳамда иккита кумуш медални қўлга киритди. Ҳамюртимиз даст кўтаришда 181 кг (кумуш), силтаб кўтаришда 219 кг (олтин) ва умумий ҳисобда 400 кг (кумуш) натижа қайд этди.
Эслатиб ўтамиз, кечаги дастурда ҳамюртларимиздан Сарварбек Зафаржонов (битта кумуш ва иккита бронза) ҳамда Муаттар Набиева (учта бронза) ҳам совриндорлар сафидан жой олганди.
Жисмоний тарбия ва спорт вазирлиги
Матбуот хизмати
