Xabar berganimizdek, ayni kunlarda Xitoyning Tyanszin shahrida og‘ir atletika bo‘yicha jahon kubogi musobaqalari bo‘lib o‘tmoqda.
Musobaqaning bugungi dasturi ham hamyurtlarimiz uchun muvaffaqiyatli boshlandi. Bugungi bahslar doirasida qizlar o‘rtasida -81 kg vaznli atletimiz Tursunoy Jabborova ham jamoamiz hisobiga uchta medal qo‘shib qo‘ydi.
Hamyurtimiz dast ko‘tarish mashqida 100 kg, siltab ko‘tarishda 120 kg, ikkikurashda esa 220 kg toshni o‘ziga bo‘ysundirdi va har uchchala yo‘nalishda ham kumush medal sohibasiga aylandi.
Jahon kubogi doirasida erkaklar o‘rtasida -109 kg vaznli atletlar orasida bo‘lib o‘tgan bellashuvlarda esa vakillarimiz oltin medalga sazovor bo‘ldi. Ushbu vazn toifasida vatanimiz sharafini himoya qilgan Akbar Jo‘rayev uchkurash yakuniga ko‘ra bitta oltin hamda ikkita kumush medalni qo‘lga kiritdi. Hamyurtimiz dast ko‘tarishda 181 kg (kumush), siltab ko‘tarishda 219 kg (oltin) va umumiy hisobda 400 kg (kumush) natija qayd etdi.
Eslatib o‘tamiz, kechagi dasturda hamyurtlarimizdan Sarvarbek Zafarjonov (bitta kumush va ikkita bronza) hamda Muattar Nabiyeva (uchta bronza) ham sovrindorlar safidan joy olgandi.
Jismoniy tarbiya va sport vazirligi
Matbuot xizmati
