«Ювентус» ҳужумчиси Криштиану Роналдунинг агенти Жорже Мендеш «Барселона» форварди Лионель Месси 2019 йилда «Олтин тўп»га муносиб эмас, деб ҳисоблайди.

«Роналду – жаҳоннинг энг яхши футболчиси. Унгача Португалия терма жамоаси ҳеч нарса ютмаган эди, у билан эса Европа чемпиони бўлди, Миллатлар лигасида ғолиб чиқди. У жаҳон футболини ўзгартирди. Авваллари Португалия ҳақида гап кетганда, ҳамма кичик мамлакатни кўз олдига келтирар эди. Ўйлашимча, Роналду келаси йилда терма жамоадаги голлари сонини 110тага етказиб, жаҳон рекордини ўрнатади. Ишончим комил, у олтинчи «Олтинчи тўп»ни қўлга киритади.

Бу йилда Месси совринни ноҳақ қўлга киритди. Роналду Миллатлар лигасида ғолиб чиққан эди. Лекин ҳаёт шундай. Агар у "Реал"да ўйнаётганида, совринни ютган бўларди. Роналду – чемпион, у 2020 йилда ғолибликни қўлга киритиш учун нима қилиш кераклигини яхши билади», – деди Мендеш.

Эслатиб ўтамиз, "Олтин тўп" учун ўтказилган сўровномада Месси «Ливерпуль» ҳимоячиси Виржил ван Дейкни 7 баллга ортда қолдирди. Роналду эса учинчи ўринни эгаллади.