Мадриднинг «Атлетико» клуби ҳужумчиси Хулиан Альварес яна бир топ-клуб — «Пари Сен-Жермен» эътиборини тортди.

Журналист Ромен Гаденнинг хабар беришича, парижликлар бўлажак трансфер ойнасида 26 ёшли футболчини қўлга киритиш имкониятларини ўрганишмоқда. Аргентиналик футболчини таклиф этишдан шахсан Франция гранди бош мураббийи Луис Энрике манфаатдор. Испаниялик мутахассис «матрасчилар» юлдузининг қобилиятини жуда юқори баҳолайди.

Хулиан Альвареснинг «Барселона»га ўтиши ҳақидаги хабарлар анчадан бери тарқалиб келади, шунингдек, даъвогарлар орасида Англия Премьер-лигаси клублари ҳам тилга олинмоқда. Transfermarkt портали экспертларининг талқинига кўра, футболчининг нархи 100 миллион еврони ташкил этади.