«Барселона» президенти Жоан Лапорта яқинда берган интервьюсида клубнинг ёш истеъдоди Дро Фернандеснинг кутилмаганда «ПСЖ» сафига бориб қўшилгани ҳақида гапириб, ушбу трансфер тафсилотларига тўхталди. Клуб раҳбари мазкур кетишни шунчаки трансфер эмас, балки «сотқинлик» дея таърифлади.

Лапортанинг фикрича, бу воқеада асосий ролни футболчининг агенти Иван де ла Пенья ўйнаган. Президент агентни клуб раҳбариятини алдаб, жамоа ортидан яширинча Париж клуби билан музокаралар олиб борганликда айблади.

«Биз унга тўлиқ ишонган эдик, у эса бизни шармандали тарзда сотиб кетди», — дея ўз норозилигини билдирди Лапорта.

Маълум бўлишича, футболчининг кетиши бош мураббий Ханси Флик учун ҳам кутилмаган зарба бўлган. Боиси, германиялик мутахассис Дрони жамоанинг келажакдаги муҳим бўлаги деб ҳисоблаб, унга асосий таркибдан мунтазам жой бериб келаётган эди.

Эътиборли жиҳати шундаки, Лапорта «ПСЖ» клуби ёки унинг раҳбариятига нисбатан ҳеч қандай эътирози йўқлигини, барча масъулият ва айб фақатгина агентнинг «нопок ўйинлари»да эканини алоҳида қайд этди.