Футбол тарихидаги энг машхур “эл-класико” лақабли учрашувнинг аҳамияти доиммо катта бўлиб келган. “Реал Мадрид” ва “Барселона” майдонда тўқнаш келар экан, кескин қарама-қаршиликка бой жанговар футбол кўришингиз кафотланган…
Статистика
Бу мавсумдаги “классико” 7 ҳафтага сурилган бўлсада, унинг чемпионлик пойгасида тутуган ўрни заррача камайгани йўқ. Катта эҳтимол билан, чемпионлик учун кураш азалий рақиблар ўртасида бўлиб ўтадиган кўринади. Шундай экан, бугунги учрашувда ғалаба қозонган жамоада чемпионлик учун яҳшигина имконият пайдо бўлиши аниқ.
Дарҳақиқат, бу клублар ўртасидаги кескинлик 90 йилдан бери барчанинг эътибор марказида турибди. Бу айрим мусобақаларнинг ҳам ёшидан каттароқ қарама-қаршилик эканлиги турган гап. “Барса” ва “Реал” “Ла Лига” доирасида шу кунга қадар 179 бор тўқнаш келишган ва икки клубда ҳам 72 тадан ғалаба мавжуд! Эътибор беринг 72 тадан! Бу шунчаки “дахшат”ли статистика.
Агарда барча мусобақалардаги “эл-класико”ларни қўшиб ҳисобласак, Католонияликларда 96 та, Мадрид клубида эса, 95 та ғалаба мавжуд. Бу борадаги статистиканинг ўзиёқ жамоалар қанчалар бир-бирига муносиб рақиб эканлигини билдириб турибди. Ер юзида азалий рақиблар етарлича топилади, лекин испаниядаги тўқнашув улардан мусотасно. Сабаби, бу жамоалар ўртасидаги учрашув ҳеч қачон зерикарли ўтмаган ва ўтмаса ҳам керак. Аслида, Ёҳан Кройфнинг футболи Католония мактабларида ўргатилмагунига қадар, “Реал” бирмунча устунликка эга эди. Айнан “учар голланд” фалсафаси “Барселона”нинг имкониятларини оширди ва “эл класико”ни янада шиддатли бўлишини таъминлаб берди. Айниқса, янги асрнинг илк 10 йиллигидан сўнг, “Барселона”да сезиларли ўсиш кузатилди. Пеп Гвардиоланинг футбол оламида қилган инқилоби ўз сўзини айтмай қолмади ва чемпионат баҳслариннинг сўнгги 13 тасидан атиги 4 ўйиндагина “Реал Мадрид” ғолиб чиққан холос. Ҳисоб-китобларга қараганда, “ел-классико”ларда ўртача 3,6 тадан гол киритилар экан. Бу “Копа Америка”, “ЕЧЛ” сингари нуфузли мусобақалардаги ўйинларданда томошабопроқ учрашув бизни кутиб турганини билдиради. Бундан 17 йил аввалгина, бу жамоалар ўртасида нурсиз дуранг қайд этилган бўлиб, кейинчалик бошқа бу натижа қайта таблода кўрниш бермади. Сўнгги 10 йил ичида биз “Барселона” ва “Реал Мадрид” ўйининг 37 ҳил кўринишда давом этганига гувоҳ бўлдик ва жамоалар бизга 126 та гол совға қилишди ва 3,1 миллион мухлис бу ўйинларни бевосита стадиондан туриб кузатди.
Марҳамат саҳнага чиқинг жаноб Месси
Лео учун “Реал Мадрид”га қарши баҳслар ўзгача аҳамият касб этади. Сўнгги 10 йил ичида барча “классико”ларда биринчи планда ҳаракат қилган қаҳрамонимиз бугун бўлиб ўтадиган учрашувда ҳам ташаббусни ўз қўлига оладими? Бўлиш мумкин. Шундай бўлишига қарамай, сўнгги 5 та учрашувда Мессининг сермаҳсуллиги сезиларли даражада тушиб кетди. Сўнгги 5 та “ал-мумтоз”нинг атиги 3 тасида асосий таркибда тушган аргентиналик ҳужумчи бор йўғи бир бор рақиб дарвозаларини ишғол қилишга муваффақ бўлган. Ўтган мавсумда Лопотеги бошчилигидаги “Реал Мадрид” 5:1 ҳисобида тор-мор этилган ўйинда Лео “Камп Ноу”нинг ВИП ўриндиқларидан ўйинни томоша қилгани ёдингизда бўлса, ажаб эмас.
Бу баҳс олдидан нафақат Месси, балки Луис Суарес ҳам катта саҳнага чиқиши мумкин. Сўнгги 14 та “эл-класико”да 11 бор гол киритишга муваффақ бўлган ҳужумчи ҳам ўйинга ўз таъсирини ўтказишга қодир. Шу ўринда Ўзининг энг яҳши мавсумини ўтказаётган Тер Штегеннинг ҳам таъсири салмоқли бўлиши мумкин.
Мадрид учун катта имконият
Католония клуби ўз уйидаги сўнгги 10 та учрашувда рақиб дарвозаларини 30 бор ишғол қилишни уддалади. Бундан кўриниб турибдики, Мадридлик меҳмонларга осон бўлмаслиги аниқ. Шундай бўлсада, Зидан ўзининг тактик устулиги эвазига Валвердени доғда қолдириши мумкин. “Қироллик клуби” майдон марказидаги устунликни қўлга олишни биринчи планга олиб чиқадиган кўринади. “Барселона”дан фарқли ўлароқ, ҳозирда Зидан ўзининг ўйин фалсафасига ранг-баранглик киритиб бормоқда. Эндиликда Зизу шогирдлари марказда 4 киши бўлиб, ёки ҳимояда 5 киши бўлиб кўриниш бермоқда ва 3 йил давомида қўл келган стратегиянинг янгиланган вариянтини тақдим этишмоқда. Ушбу учрашувда катта эҳтимол билан асосий юк Карим Бенземага юклатилса, ажаб эмас. Ҳужумчи сермаҳсуллик борасида ўзи учун энг яҳши мавсумларидан бирини ўтказмоқда ва майдондаги позитсиясини ўзгартириб бормоқда. Эндиликда у Роналдуга эмас, бутун жамоа унга ўйнамоқда.
Таҳминий таркиблар
“Барселона”: Тер Штеген, Ланглет, Пике, Самеду, Сергио Робертто, Ракитич, Бускетс, Де Ёнг, Суарес, Гризман, Месси.
“Реал Мадрид”: Куртуа, Карваҳал, Рамос, Варан, Менди, Модрич, Валверде, Казимиро, Кроос, Бензема, Бейл.
Таркиблар борасида иккита жамоада ҳам муаммолар йўқ эмас. “Барселона” Усман Дембелесиз майдонга тушса, “Реал Мадрид” Марсело ва Эден Азардан фойдалана олмади. Бир қарашда, Азарнинг йўқотилиши улкан кўринади, бироқ у сафда бўлганида ҳам катта эҳтимол билан “Барса”нинг прессингига дош бера олмас эди. Ўз спорт формаси ва кичик жароҳатларга ўрлашиб қолган белгиялик футболчининг ўртамиёна жамоаларга қарши ўйинлардаги статистикасининг ўзиёқ сўзимизга исбот бўлади десак, адашмаган бўламиз. Афсуски, “Барселона” учун ҳам Дембеле улкан йўқотиш эмас. Иқтидорли ҳужумчи беқарор ўйин кўрсатгани боис, у жамоанинг аниқ бир меҳанизмига жавоб берувчи футболчи даражасига кўтарила олмади. Валверде унинг ўрнини Гризман ёрдамида ортиқча қийинчиликсиз беркитишга қодир. Марсело борасида ҳам шундай аҳвол. Борган сари асосий таркибдаги ўрнини Ферлан Мендига бой бераётган ҳимоячининг ўйинларида хатолар кўп кузатилмоқда. Боз устига ёш ҳам секин-аста ўз кучини кўрсатаётганига гувоҳ бўляпмиз. Шундай экан, бугунги ўйиннинг шиддати заррача камаймаслиг аниқ. Бугн тунда “эл класико” лақабли энг машхур қарама-қаршиликни ўткаазиб юборманг!
