Эрон олимпия терма жамоаси бош мураббийи Ҳамид Эстилий Осиё чемпионатининг 1-тури доирасида Ўзбекистонга қарши бўладиган ўйин олдидан ўз фикрларини билдириб ўтди.

"Одатда Эрон терма жамоаси Осиёнинг энг яхши жамоалари сафига киради. Биз ҳақиқатан ҳам кучлимиз, аммо илгари Олимпия ўйинлари саралаш босқичида биз тақвим билан боғлиқ муаммоларга дуч келганмиз. Ўйинлар ФИФА кунларидан бошқа пайтга қўйилгани учун энг яхши футболчиларимиз билан иштирок эта олмаганмиз. Бу сафар эса ўйинчиларни йиғиб, ўқув-машғулот йиғинини ва ўртоқлик ўйинларини ўтказиш имкониятига эга бўляпмиз.

Бу гуруҳдан ўрин олган барча 4та жамоа кейинги босқичга чиқиш учун имкониятга эга. Биз Ўзбекистонни яхши биламиз. Уларнинг яхши мураббийи ва яхши футболчилари бор. Профессионал лигамиздан энг яхши эронлик футболчиларни йиғишга муваффақ бўлдик. Биз — Эронмиз. Нима қилишни биламиз», — деди Эстилий.

Эслатиб ўтамиз, Ўзбекистон ва Эрон олимпия терма жамоалари ўртасидаги ўйин Тошкент вақти билан 15:15да бошланади.