Олимпия терма жамоамиз сардори Ислом Қобилов AFC расмий сайти учун кичик интервью бериб ўтди.

"Бу учрашувдан сўнг хотиржамликка берилишга ҳаққимиз йўқ. Сабаби, асосий мақсадимизга ҳали эришганимизча йўқ. Асосий мақсадимиз чемпионликни сақлаб қолиш. Бундан бошқаси ҳақида ўйламаяпмиз.

Айни дамда мураббийларимиз штаби ҳам ортиқча ҳис-ҳаяжонга берилмасликни ва Саудия Арабистонига қарши учрашувга қадар тикланиб олиш қанчалар муҳим эканлигини  тушунтиришмоқда. Сабаби, Жанубий Корея билан ўйиндан сўнг, биз асосий вақтимизни тикланишга сарф этдик ва бу ўз самарасини берди. Шу ўринда рақибимизни Бурирамдан учиб келганини унутмаслик лозим. Учрашув бошида гол ўтказиб юборганимиз ҳам бироз қўл келди. Сабаби, голдан сўнг олдимизда 80 дақиқа вақт мавжудлигини ҳис этдик ва хотиржамлик билан ўйинга қайтдик.

Саудия Арабистони билан ҳам шошмасда, хотиржамлик билан ўз ўйинимизни кўрсатишимиз керак. БААга қарши учрашувда ўзимдан кўнглим тўлмаган жойлари ҳам бўлди. Масалан, гол ўтказиб юборган вазиятимизда менинг ҳам айбим бор. Агар рақибимиз БААдан савиялироқ жамоа бўлганида 5 гол киритишимизга имкон бермаган бўлар эди.

Жамоавий ўйиндан кўнглим тўлди. Биз руҳий тушкунликни енгиб ўтиб ўйинга қайтдик ва рақиб дарвозасига 5 та аниқ зарба йўлладик. Ўйиндан сўнг, мураббийларимиз ҳам миннатдорчилик билдиришди. Ғалабани, тўполон қилиб нишонламадик. Барчамиз билиб турибмиз-ки, ҳали асосий вазифа бажарилгани йўқ.

Тўғри, ярим финалдамиз, тўғри, жамоамиз ўз ўйнини топиб олди, бироқ бу ҳали ҳеч нарсани англатмайди. Бу ерга чемпионлик учун келганмиз. Ярим финалдаги ўйинда ғолиб чиқсаккина байрам қилишимиз мумкин. Унга қадар ҳал қилувчи ўйинларга тайёргарлика урғу берамиз", — деди Қобилов.