Ориф Толиповдан анонс: «Ночор ҳужум чизиғи, «Ред Булл» ва Жозе...»

Ғалабасиз беш ўйин, АПЛ турнир жадвалида 8-ўрингача тушиш, Англия кубогини тарк этиш ва ЧЛни нимчорак финалда якунлаш учун яхшигина “имконият”! “Тоттенҳэм”да Сон Хён Миннинг Ҳарри Кейн каби сафдан чиқиши билан муаммолар йириклашиб кетди. Бунинг устига ўзи шу муаммоларни ёпиш учун таркибга жалб қилинган Бервейннинг ҳам жароҳат олиши мувозанатни буткул бузиб юборди.

Жозе албатта, матбуот анжуманларида ўзини қандай тутишни исталган мураббийга ўргатиши мумкин. Лекин, бу сафар унинг айтган гаплари фақат лондонлик  мухлисларни овутиш учун янграгандек туюлди.

"Ўзим ишлаган барча жамоаларда соврин ютганман. Ўйлайманки, “Тоттенҳэм” бундан мустасно бўлмайди. Клубни қийин вазиятда қабул қилиб олдим. Ҳозир ҳолат янада мураккаб! Бироқ, футболчиларимга ишонаман!"

Яхшиямки “Тоттенҳэм” биринчи ўйинда кичик ҳисобда мағлуб бўлди (0:1). Биринчи ўйинни эсласак, ҳолат бундан ҳам ёмонроқ бўлиши мумкинлиги ёдга келади. Энди уларни меҳмон жамоалар  бир ойдан кўпроқ муддатдан буён ғалаба қозона олмаётган стадионда ўйин кутмоқда.

“РБ Лейпциг” ҳақида фақат ижобий фикрларни билдира оламан. Йўқ, уларнинг мукаммал ўйинларидан эмас бу! Бу – улар ўз бўйларидан баландга (анча баландга) сакрай олаётганлари учун шундай.  “Редбуллчилар”нинг сири ўша машҳур ичимликда эмас албатта. Сир – тўғри йўлга қўйилган менежментдир. Тимо Вернер эса майдондаги ҳақиқий “қизил буқа”! У эса қисқа муддатдан яна сафга қайтди.

Дўстлар, бугун сизни якуни аниқ қизиқ бўладиган ўйин кутмоқда. Ахир, “Тоттенҳэм” қайта олса, бу – камбэк! “Лейпциг” ўта олса, бу -  сенсация!

Телеканал: UzReport TV
Соат: 00:55  

Ориф Толипов.

PS: Бу ерда ёзишга улгурмаган жиҳатларим ҳақида соат 00:00да бошланадиган Cтудия лойиҳасида айтиб ўтишга ҳаракат қиламан. У эса Футбол ТВ теленалида эфир юзини кўради, доимдек!