G‘alabasiz besh o‘yin, APL turnir jadvalida 8-o‘ringacha tushish, Angliya kubogini tark etish va CHLni nimchorak finalda yakunlash uchun yaxshigina “imkoniyat”! “Tottenhem”da Son Xyon Minning Harri Keyn kabi safdan chiqishi bilan muammolar yiriklashib ketdi. Buning ustiga o‘zi shu muammolarni yopish uchun tarkibga jalb qilingan Berveynning ham jarohat olishi muvozanatni butkul buzib yubordi.

Joze albatta, matbuot anjumanlarida o‘zini qanday tutishni istalgan murabbiyga o‘rgatishi mumkin. Lekin, bu safar uning aytgan gaplari faqat londonlik  muxlislarni ovutish uchun yangragandek tuyuldi.

"O‘zim ishlagan barcha jamoalarda sovrin yutganman. O‘ylaymanki, “Tottenhem” bundan mustasno bo‘lmaydi. Klubni qiyin vaziyatda qabul qilib oldim. Hozir holat yanada murakkab! Biroq, futbolchilarimga ishonaman!"

Yaxshiyamki “Tottenhem” birinchi o‘yinda kichik hisobda mag‘lub bo‘ldi (0:1). Birinchi o‘yinni eslasak, holat bundan ham yomonroq bo‘lishi mumkinligi yodga keladi. Endi ularni mehmon jamoalar  bir oydan ko‘proq muddatdan buyon g‘alaba qozona olmayotgan stadionda o‘yin kutmoqda.

“RB Leypsig” haqida faqat ijobiy fikrlarni bildira olaman. Yo‘q, ularning mukammal o‘yinlaridan emas bu! Bu – ular o‘z bo‘ylaridan balandga (ancha balandga) sakray olayotganlari uchun shunday.  “Redbullchilar”ning siri o‘sha mashhur ichimlikda emas albatta. Sir – to‘g‘ri yo‘lga qo‘yilgan menejmentdir. Timo Verner esa maydondagi haqiqiy “qizil buqa”! U esa qisqa muddatdan yana safga qaytdi.

Do‘stlar, bugun sizni yakuni aniq qiziq bo‘ladigan o‘yin kutmoqda. Axir, “Tottenhem” qayta olsa, bu – kambek! “Leypsig” o‘ta olsa, bu -  sensasiya!

Telekanal: UzReport TV
Soat: 00:55  

Orif Tolipov.

PS: Bu yerda yozishga ulgurmagan jihatlarim haqida soat 00:00da boshlanadigan Ctudiya loyihasida aytib o‘tishga harakat qilaman. U esa Futbol TV telenalida efir yuzini ko‘radi, doimdek!