Роналдиньо мен учун жуда қадрли футболчи. Бутун дунё коронавирус пандемияси билан овора бўлиб турган бир вақтда “афсунгар” яна бир турнир ғолибига айланди. Бу шундай бир мусобақаки, унда ғолиблик бундан аввал ҳам, катта эҳтимол билан кейин ҳам унинг даражисидаги футбол афсонасига насиб этмаса керак. Сохта паспорт билан муаммолардан сўнг Парагвай қамоқхонасида бўлиб турган Роналдиньо маҳбуслар ўртасидаги турнир финалининг энг яхши футболчиси бўлди. Бироз кулгили, бироз ачинарли ва бироз ўйлантирувчи ҳолат!

Кулгу ва ачиниш нима сабабли экани ҳаммага тушунарли бўлса керак. Ўйларчи?!

Мен Роналдиньонинг тақдири кўпроқ Пелега ўхшашини истардим. Гарринчага эмас. Ҳар иккисининг ўйинини кўрмаган бўлсамда, айтишларича Гарринча Пеледан қолишмайдиган даражадаги иқтидор эгаси бўлган. Бироқ, у футболчилик вақти ҳам, кейин ҳам турли можаро ва иллатларга ўралашиб қолган. Шу сабабли балки, ёш авлод вакилларининг аксари Гарринча кимлигини билишмаса ҳам керак! Бунинг устига Рони ичкарида ҳам ичишни давом эттирмоқда.

Очиғи, бу воқеа – қандайдир парагвайлик наркобарон томонидан атайин уюштирилгандек таассурот уйғотмоқда. Айтайлик, қамоқда муддат ўтаётган бирор шартли “Пабло Эскобар” ўз севимли футболчисини кўргиси келиб қолган бўлиши мумкин.

Майли нима бўлган тақдирда ҳам Роналдиньога кейинги фаолиятида  омад тилаб қоламан!

Ориф Толипов.