Айни пайтда фаолият юритаётган футболчилар орасида энг кўп гол урган футболчи — бу Криштиану Роналду.

Португалиялик футболчининг расмий ўйинлардаги жами голлари сони 725тани ташкил қилмоқда. У шу пайтгача роппа-роса 1000та ўйинда майдонга тушган. Роналду ўз голларини «Спортинг», «МЮ», «Реал», «Ювентус» ва Португалия терма жамоаси сафида урган. Криштиану ҳисобида, шунингдек, 221та ассист ҳам бор.

Иккинчи ўринни Лионель Месси эгаллаб турибди. Аргантиналик футболчининг голлари 697тага етди. У мазкур мавсумнинг ўзида (агар давом эттирилса) етти юзлик довонни босиб ўтса керак. Лео барча голларини "Барселона" ва Аргентина термаси сафида урган. Месси ҳисобида 289та ассист ҳам бор.

Учинчи поғона Златан Ибраҳимовичга тегишли. Швециялик футболчи фаолияти давомида жами 522та гол урган. У ушбу тўпларни «Мальмё», «Аякс», «Ювентус», «Интер», «Барселона», «Милан», «ПСЖ», «МЮ», «ЛА Гэлакси» ва Швеция терма жамоаси таркибида киритган.