UFC президенти Дэйна Уайт икки вазн тоифаси собиқ чемпиони Конор Макгрегорнинг чемпионлик камари учун жанг қилиш ҳуқуқини қўлга киритиши ҳақида гапирди.
Уайтнинг сўзларига кўра, Макгрегор 2020 йилнинг кузида ўтказилиши кутилаётган Ҳабиб Нурмагомедов — Жастин Гэтжи жанги ғолиби билан октагонга чиқиши мумкин.
«Мен дастлаб Гэтжи ва Ҳабиб ўртасидаги жангдан завқ олмоқчиман ва унинг қандай якунланишини кўрмоқчиман. Шундан кейин ғолиб ва Конорнинг жангини кутаман», — дейди Уайт.
Шундай қилиб агар Нурмагомедов Гэтжини мағлуб этса, яна Макгрегор қарши октагонга кўтарилиши мумкин. Эслатиб ўтамиз, 2018 йилнинг октябрь ойида Нурмагомедов ва Макгрегор ўртасида жанг бўлиб ўтган. Унда россиялик спортчи тўртинчи раундда оғритиш усулини қўллаб Конорни таслим этганди. Шундан сўнг Макгрегор бир неча бор реванш жанги ўтказиш истагини билдирган, аммо Нурмагомедов ҳар сафар бу жангнинг ҳеч кимга қизиқ бўлмаслигини таъкидлаб келади.
