Мадриднинг «Атлетико» клуби 10 йилдан бери Испания Ла Лигасида «Барселона»ни мағлуб эта олмаяпти.

Сўнгги марта «матрасчилар» Ла Лига доирасида 2010 йилнинг февраль ойида каталонияликларни мағлубиятга учратган. Ўшанда «Атлетико»ни Кике Санчес Флорес бошқарарди. Шундан кейинги ўйинларда «Барселона» 14 марта ғалаба қозонган бўлса, 6 марта жамоалар муроса йўлини танлаган.

33-тур доирасида «Камп Ноу»да ўтказилган ўйинда «Барселона» ва «Атлетико» жамоалари 2:2 ҳисобидаги дурангни қайд этди.

Бундан ташқари, Мадрид клуби Диего Симеоне қўл остида «Барселона»ни сафар ўйинларида мағлуб этишни ҳам уддалай олмаяпти. Бу серия барча мусобақалар доирасида 11 та ўйиндан иборат. Каталонияликлар 6 та ўйинда ғалаба қозонган, 5 та ўйин эса дуранг билан якунланган.

Ушбу натижадан кейин Мадрид клуби 59 очко тўплаган ҳолда, мусобақа жадвалида 3-ўрнида бораётган бўлса, «Барселона» 70 очко билан 2-поғонани эгаллаб турибди.